మామోగ్రామ్ ఏ వయసు నుంచి...?......పరీక్షా సమయం.

రొమ్ముక్యాన్సర్‌ను నిర్ధారణ చేసే పరీక్ష అయిన మామోగ్రామ్‌ను ఏ వయసు నుంచి చేయించాలనే అంశంపై భిన్నాభిప్రాయాలున్నాయి. రొమ్ముక్యాన్సర్‌ను ముందుగానే కనుక్కోవడం ద్వారా ఎలాంటి ప్రమాదం లేకుండా చూసేందుకు, రొమ్ము తొలగించాల్సిన అవసరం కూడా లేకుండా చేసేందుకు దీన్ని 40వ ఏట నుంచి చేయించాలంటూ చాలామంది డాక్టర్లు సలహా ఇస్తుండగా మరికొంతమంది మాత్రం దీన్ని 50 తర్వాత నుంచి చేయించవచ్చని చెబుతుంటారు. ఈ విషయాన్ని నిర్ధారణ చేసేందుకు అమెరికాలోని ఓరెగాన్ హెల్త్ అండ్ సైన్స్ యూనివర్సిటీ దాదాపు 66 అధ్యయనాలను నిర్వహించింది. రెండురకాల రిస్క్‌లు ఉన్న మహిళల్లో దీన్ని నలభై దాటిననాటి నుంచే ఈ పరీక్షను రొటీన్‌గా తరచూ చేయించడం మంచిదని అవి పేర్కొంటున్నాయి. ఆ రిస్క్‌లు ఏమిటంటే... సమీప బంధువుల్లో ఎవరికైనా బ్రెస్ట్‌క్యాన్సర్ కుటుంబచరిత్ర ఉండటం ముందుగా చేయించిన మామోగ్రామ్‌లో బ్రెస్ట్‌టిష్యూ చాలా మందంగా ఉన్నదనే ఫలితం వచ్చి ఉండటం. పై రిస్క్‌లతో పాటు... దూరపు బంధువుల్లో రొమ్ము బయాప్సీలో హానికరంకాని (బినైన్) గడ్డలు ఉన్నట్లు తేలినా లేదా అలాంటి బయాప్సీ పరీక్షలో రొమ్ము క్యాన్సర్ ఉన్నట్లు తేలినా అంతకు ముందు గర్భనిరోధకమాత్రలు వాడే అలవాటు ఉండటం లేదా పిల్లలు లేకపోవడం లేదా 30 ఏళ్ల తర్వాతే తొలిచూలు గర్భం రావడం లాంటి కేసుల్లో రొమ్ము టిష్యూ మందం మరీ ఎక్కువగా లేకుండా ఒక మోస్తరుగా ఉన్నా 40 ఏళ్ల నుంచే మామోగ్రామ్ చేయిస్తుండటం మంచిదని ఆ అధ్యయనాలు చెబుతున్నాయి.