మీ పిల్లల ఆహారంలో పోషకాలున్నాయా?

పిల్లలు చాలా పీలగా ఉన్నారు... ఎంత తిన్నా తిండికి లేనివాళ్లలాగే ఉసూరుమంటున్నారని చాలామంది తల్లిదండ్రులు బాధపడుతుంటారు. అయితే తినే పరిమాణం సంగతి పక్కనపెట్టి వాళ్లకు సరిపడిన కేలరీలు అందుతున్నాయా? అని ఆలోచిస్తే సమస్య ఇట్టే పరిష్కారం అవుతుంది. అయితే ముందుగా ఎందులో ఎన్ని కేలరీలున్నాయో తెలియాలి కదా! అలాంటి కొంత సమాచారం... ఉడకబెట్టిన ఒక కోడి గుడ్డు సుమారు 80 కాలరీల శక్తి నిస్తుంది. ఇందులో 6గ్రాముల ప్రొటీన్‌, 590 యూనిట్ల విటమిన్‌ ఎ ఉంటుంది. గుడ్డు తినని కుటుంబాలలోని పిల్లలకు రోజూ 8 జీడిపప్పులు ఇస్తే, అందులో 95 కాలరీలు, 3గ్రాముల ప్రొటీన్‌ ఉంటాయి. స్కూలుకి వెళ్ళే పిల్లలకు రోజూ సాయంత్రం 3 బ్రెడ్‌ స్లయిసులు ఇస్తే 150 కాలరీలు, 6 గ్రాముల ప్రొటీన్‌ లభిస్తుంది. ఇక ఫ్రూట్స్‌ విషయానికి వస్తే, ఒక బత్తాయి(ఆరంజ్‌) 50 కాలరీలనిస్తే ఒక పెద్ద యాపిల్‌ లేదా అరటి పండు 80 కాలరీలను ఇస్తాయి. ఆలుగడ్డలు (పొటాటో) కూడా మంచి పోషక విలువలు కలిగివున్నాయి. 100గ్రాముల ఉడికిన పొటాటోలలో 85కేలరీలు, 3గ్రాముల ప్రొటీన్‌ లభిస్తాయి. ఫ్రూట్స్‌, ఆకుకూరలు, కూరగాయలలో ఫైబర్స్‌, మినరల్స్‌ ఎక్కువ. ఐరన్‌, కాల్షియం ఉంటాయి. తొందరగా జీర్ణమవుతాయి. మలబద్దకం ఉండదు. ఇవి ఎక్కువగా తినే పిల్లల్లో డైవర్టిక్యులైటిస్‌, ఎపెండిసైటిస్‌ వ్యాధులు కూడా చాలా అరుదుగా వస్తాయి. స్కూలుకు వెళ్ళే పిల్లలకు సీజనల్‌ ఫ్రూట్స్‌ ప్రతి రోజూ ఒక కాయైనా పూర్తిగా ఇవ్వటం మంచిది. పళ్ళలోని ఫైబర్‌ జీర్ణశక్తిని పెంచుతుంది. పండుగా తినడానికి ఇష్టపడని పిల్లలకు జ్యూస్‌గా అయినా ఇవ్వండి. 5 సంవత్సరాల లోపు పిల్లలకు 150మి.లీ(ఒక కప్పు) సరిపోతుంది. పెద్ద పిల్లలకు 1 1/2-2 కప్పుల వరకు ఇవ్వవచ్చును. మామిడి, ద్రాక్ష, వాటర్‌మిలాన్‌ ముక్కలతో ఫ్రూట్‌ సలాడ్‌ చేసి పెట్టండి. వెజిటబుల్స్‌ తక్కువగా తినే పిల్లలకు రోజుకో రకం సూప్‌గా చేసి ఇస్తే ఆనందంగా తాగుతారు. అలాగే వెజిటబుల్స్‌ని ఆమ్లెట్‌లో కలిపి ఇవ్వవచ్చు.