అమెరిక... అమెరిక... అమెరికా

 

ప్రపంచ దేశాలకు పెద్దన్న... అమెరికా అంటే భూతల స్వర్గం. అక్కడి జీవితం సర్వ సుఖాల మయం. అక్కడికి వెళ్లగలిగితే చాలు! డాలర్ల పంటే!!.

 

'అమెరిక అమెరిక అమెరికా... అందమైన అమ్మాయిలాంటి అమెరికా'.... ఒక తెలుగు సినిమా పాట పల్లవి ఇది. అవును, తెలుగువారికే కాదు, భారతీయులకే కాదు, ప్రపంచ వ్యాప్తంగా పెద్ద సంఖ్యలో అందరినీ అకర్షించే దేశం అమెరికా. ప్రపంచ దేశాలకు పెద్దన్న... అమెరికా అంటే భూతల స్వర్గం. అక్కడి జీవితం సర్వ సుఖాల మయం. అక్కడికి వెళ్లగలిగితే చాలు! డాలర్ల పంటే!!. అక్కడికి వెడితే జన్మ సార్థకమైనట్టేనని భావిస్తుంటారు. ఈ అభిప్రాయం ఒక్క భారతీయులకే కాదు... ప్రపంచంలోని అనేక దేశాల వారికి ఇదో ఆకర్షణీయ దేశం. వివిధ దేశాల నుంచి అమెరికాకు వలస వెళ్లాలని, అక్కడ స్థిరపడాలని కోరుకునేవారెందరో.. ఇదే విషయం తాజాగా నిర్వహించిన ఓ ఒపీనియన్ పోల్‌లో వెల్లడైంది. వీరిలో కోటి మంది భారతీయులు సైతం ఉండడం విశేషం. అమీర్ పేట అంటే తెలియనివారు ఉండవచ్చేమో కానీ... అమెరికా అంటే తెలియనివారు ఉండరంటే అతిశయోక్తి కాదేమో. మూడో తరగతి చదివే పిల్లలు మొదలు మూడు కాళ్ళ ముదుసలివరకూ అందరికీ అమెరికా అంటే విపరీతమైన ఆకర్షణ. ఒక్కసారయినా అక్కడకు వెళితే బాగుండని తెగ కలలు కంటారు. కూర్చున్నా, నిలబడ్డా అదే ఆలోచన. డాలర్లు, పౌండ్లు కళ్ళముందు వర్షిస్తుంటాయి. అక్కడి అందమైన రోడ్లు, ఆకాశ హర్మాలు, ఆకర్షణీయమైన వస్తువులు నర్తన చేస్తూ కనిపిస్తాయి. ఏదో సందర్భంలో అమెరికాను తల్చుకుంటూ, అక్కడున్న మనవాళ్ళతో కబుర్లాడినప్పుడల్లా 'అబ్బ ఎంత అదృష్టవంతులో!' అని బుగ్గలు నొక్కుకుంటూ, అక్కడికెళ్ళే శుభదినం రావాలని కోటి దేవతలకు మొక్కుకుంటూ, రాబోయే ఆ సుదినం గురించి మధురోహల్లో తేలిపోతూ గడపడం నూటికి తొంభైమందికి అలవాటే. కాదనగలరేమో మీరే తేల్చుకోండి. ప్రపంచవ్యాప్తంగా పది కోట్ల మంది(100 మిలియన్లు)కి పైగా ప్రజలు అమెరికాకు వలసవెళ్లి శాశ్వతంగా స్థిరపడాలని కోరుకుంటున్నారు. ముఖ్యంగా అత్యధిక జనాభా కలిగిన కొన్ని దేశాల నుంచి అత్యధిక సంఖ్యలో ప్రజలు అమెరికాకు వెళ్లాలని కోరుకుంటున్నట్టు ‘గ్యాలప్’ పోల్ వెల్లడించింది. చైనాలో కోటీ 90 లక్షలమంది అమెరికాలో స్థిరపడాలని ఉవ్విళ్లూరుతున్నారు. తరువాతి స్థానంలో నైజీరియా పోటీ పడుతోంది. ఆ దేశం నుంచి కోటీ 30 లక్షల మంది అమెరికాపై మోజు పడుతున్నారు. ఇక భారత్ నుంచి కోటి మంది, బ్రెజిల్, బంగ్లాదేశ్‌ల నుంచి 60 లక్షల మంది చొప్పున అమెరికాలో స్థిరపడాలని కోరుకుంటున్నారు. అమెరికాలో ఎంత ఆకర్షణ లేకుంటే, అన్ని ఖండాలనుంచి, అనేక దేశాలవారు తమ బ్రతుకుతెరువు కోసం అక్కడకు పరుగులు పెడుతూ అక్కడే సెటిల్ అవటానికి ప్రయత్నిస్తారు? అమెరికాలో అంతా సజావుగా, సవ్యంగా జరిగిపోయే మాట వాస్తవం. అయితే మనం జీర్ణించుకోలేని అంశాలూ చాలానే ఉన్నాయి. చిన్నారి తప్పు చేసినా సరే దండించడానికి వీల్లేదు. దారి తప్పినా చూస్తూ వుండాలి. బ్రౌన్‌ షుగర్‌ తింటానంటే కన్నపేగు చూస్తూ వూరుకోగలదా? ఓ దెబ్బేస్తే తప్పట.. మరోవైపు ఆ భూతల స్వర్గంలో అన్నమో జీసస్‌ అంటూ అల్లాడే అభాగ్యులు నాలుగున్నర కోట్లమంది వున్నారంటే ఆశ్చర్యం వేస్తుంది. ఇది... అభూత కల్పనకాదు. సాక్షాత్తూ అమెరికా వ్యవసాయ శాఖ నివేదిక వెలువరించిన సత్యం. మనకు ఎన్ని చెప్పినా... పొరుగింటి పుల్లకూర మహా రుచిగా వుంటుంది. దూరపు కొండలు యమా నున్నగా వుంటాయి మరి.

 

ఉప్పుతో ముప్పు

 

ఉప్పుని అధికంగా వాడటం వల్ల 2010లో దాదాపు 23 లక్షల మంది మృతి చెందారు. ఉప్పుతోపాటే ముప్పు పొంచి ఉందని అర్థమవుతోంది.

 

ఉప్పు మనకు ఎంత మేలు చేస్తుందో అంత హానీ కూడా చేస్తుందని ప్రపంచవ్యాప్తంగా చేసిన ఒక అధ్యయనంలో తెలిసింది. ఉప్పుని ఎక్కవ పరిణామంలో తీసుకోవడం వల్ల ముప్పు పొంచి ఉందని తేలింది. ‘2010 గ్లోబల్ బర్డెన్ ఆఫ్ డిసీజెస్ స్టడీ’ ప్రకారం అధిక ఉప్పు వినియోగించిన కారణంగా వచ్చే సమస్యల వల్ల 2010లో ప్రపంచవ్యాప్తంగా 23 లక్షల మంది మరణించారు. అమెరికాకు చెందిన భారత సంతతి శాస్త్రవేత్త గీతాంజలి సింగ్‌తోపాటు పలువురు శాస్త్రవేత్తల బృందం చేసిన అధ్యయనంలో ఈ విషయం స్పష్టమైంది. ఈ అధ్యయనం వివరాలను ఇటీవల ‘అమెరికన్ హార్ట్ అసోసియేషన్’ సమావేశంలో వెళ్లడించారు. ఉప్పును అధికంగా వాడటం వల్ల గుండెపోటు, పక్షవాతం వంటి సమస్యలు తలెత్తి ప్రపంచవ్యాప్తంగా ఏటా లక్షలాది మంది మృత్యువాత పడుతున్నారు. వివిధ దేశాల్లో 1990-2010 మధ్యకాలంలో నిర్వహించిన 247 సర్వేలను విశ్లేషిస్తూ 50 దేశాల్లోని 303 సంస్థలకు చెందిన 488 మంది పరిశోధకులు ఈ అధ్యయనం నిర్వహించారు. ఒక రోజుకు తీసుకోవలసిన దాని కంటే (ఒక గ్రాము) ఎక్కువ పరిమాణంలో ఉప్పు తీసుకున్నవారిలో కలుగుతున్న దుష్ర్పభావాలను వీరు పరిశీలించారు. ఈ అధ్యయనం ప్రకారం ఉప్పు ఎక్కువగా తినడంవల్ల 2010లో ఉక్రెయిన్‌లో అత్యధికమంది మృతి చెందారు. ప్రతి పదిలక్షల మందిలో 2109 మంది మరణించారు. రష్యాలో 1803 మంది, ఈజిస్టులో 836 మంది, యూఏఈలో 134 మంది, ఖతార్‌లో 73 మంది కెన్యాలో 78 మంది మరణించారు. దేశం, వయసు ఆధారంగా స్త్రీ, పురుషులలో ఉప్పు వాడకం వల్ల వచ్చే మార్పులను పరిశోధన చేశారు. అధిక ఉప్పు వినియోగం వల్ల గుండెకు ఎంత చేటో గుర్తించారు. రక్తపోటు, హృద్రోగాలతో మరణించిన పది లక్షల మంది రికార్డులను పరిశీలించారు. వీరిలో 84 శాతం మంది ఉప్పును అధికంగా తీసుకోవడం వల్లే మరణించినట్లు నిర్ధారించారు. సంపన్న దేశాలకంటే పేద, అభివృద్ధి చెందుతున్నదేశాల్లోనే ఈ పరిస్థితి ఎక్కువగా ఉందని గుర్తించారు. పెద్దలే కాకుండా పిల్లలు కూడా ఎక్కువగా తినే ఆహారం (బేబీ ఫుడ్) లోని ఉప్పు ఆరోగ్య సమస్యలకు కారణమవుతోందని యూఎస్ సెంటర్స్ ఫర్ డిసీజ్ కంట్రోల్ (సీడీసీ) తేల్చింది. శరీరంలో నీటికంటే ఉప్పు ఎక్కువ ఉన్నపుడు మనం ఎక్కవగా నీరు తాగుతాం. అయితే ఉప్పు శాతం అధికంగా ఉంటే అధికంగా ఉన్న నీటి మొత్తాన్ని మూత్రపిండాలు విసర్జింప చేయలేక పోతాయి. అప్పుడు శరీరంలోని రక్త పరిమాణం పెరుగుతుంది. ద్రవపరిమాణం పెరిగి ద్రవాన్ని ఇముడ్చుకొనే ఖాళీ పెరగకపోవటంతో లోపలవత్తిడి అధికమవుతుంది. ఈ పెరిగిన వత్తిడినే మనం హైపర్ టెన్షన్ (బీపీ) అంటున్నాము. ఉప్పుకు ఎక్కువ తీసుకోకూడదని తెలిసినా కూడా చాలామంది 15 గ్రాముల వరకు తీసుకుంటారు. ఇటువంటి సందర్భాలలో శరీరంలో చేరిన అదనపు ఉప్పను మూత్రపిండాలు మూత్రం ద్వారా విసర్జించి సమతుల్యతను కాపాడుతాయి. బీపీ ఉన్నవాళ్లు కొందరు ఉప్పను అసలు తీసుకోరు. అలా చేయడం కూడా తప్పే. ఎంత హైవర్ టెన్షన్ ఉన్నవాళ్లు కూడా ఉప్పును తీసుకోవడం పూర్తిగా మానివేయ కూడదు. ఒక పరిమితిలో తక్కువగా తీసుకోవాలి. ఫాస్టు ఫుడ్స్ ఎక్కువగా తినేవారు ఉప్పుని చాలా తక్కువగా తినాలని చెబుతున్నారు. ఉప్పుతో ఆరోగ్యానికి పెద్ద ముప్పే పొంచి ఉన్నదని నిపుణులు చెబుతున్నారు. మన జాతీయ పోషకాహార సంస్థ రోజుకు ఒక వ్యక్తి 6 గ్రాముల ఉప్పుకు మించి తీసుకోకూడదని పేర్కొంది. అంతకు మించి ఉప్పు తీసుకుంటే ప్రమాదం పొంచి ఉన్నట్లే భావించాలి. ఉప్పు ఎక్కువ తీసుకుంటే గుండె జబ్బులు, మూత్రపిండాల జబ్బులు, కడుపులో క్యాన్సర్‌ వంటి వ్యాధులు వచ్చే ప్రమాదం ఉంది. మనం ఉదయం లెగిసిన దగ్గర నుంచి ఉప్పులేకుండా ఏదీ తినలేం. ఉదయం ఇడ్లీతో మొదలు పెడితే పడుకునే వరకు మనం తినే ఆహారం కూరలు, చారు, పచ్చడి, పెరుగు, పండ్లు.... ఇతర ఆహార పదార్ధాలు అన్నింటిలోనూ ఉప్పు ఉంటుంది. ఈ ఉప్పు వెనుక ఇంత ముప్పు పొంచి ఉన్నందున ఇక నుంచైనా మనం ఉప్పు వినియోగంలో జాగ్రత్తపడటం మంచిది.