టూత్‌పేస్ట్‌, పౌడర్‌తో...

- ఒక చెంచాడు టూత్‌పౌడర్‌ని నేల శుభ్రపరిచే నీళ్ల బకెట్‌లో వేయండి. నేల మునుపటి కంటే బాగా, త్వరగా శుభ్రపడుతుంది. - ఫ్రిడ్జ్‌, వైట్‌ డోర్స్‌, షోకేసులను శుభ్రపరచుకోవటానికి పాత టూత్‌ పౌడర్‌ని ఉపయోగించండి. - తేనెటీగ కుట్టి మంటపుడుతూ ఉంటే ఆ ప్రదేశంలో టూత్‌పేస్ట్‌ పూయండి. అందులో ఉండే మింట్‌ మంటని తగ్గిస్తుంది. అలాగే మొటిమలకి కూడా టూత్‌పేస్ట్‌ని రాస్తే త్వరగా తగ్గుతాయి.

కాలీఫ్లవర్‌తో...

కాలీఫ్లవర్‌ కూడా ఓ రకమైన పువ్వు జాతికి చెందినదే. విదేశాల నుండి భారతదేశానికి చేరింది. కాలీఫ్లవర్‌ పువ్వులలో చాలా ఖాళీలు ఉంటాయి. వీటి మధ్య పురుగులు ఉంటాయి. అందువలన చాలామంది ఈ పువ్వును తీసుకొనరు. దీనికి తోడు ధర కూడా ఎక్కువ. ఏది ఏమైనప్పటికి ఈ కాలీఫ్లవర్‌ పువ్వులలో సి విటమిన్‌ పుష్కలంగా ఉన్నాయి. శరీరానికి అవసరమైన అన్ని రకాల లవణాలు ఉంటాయి. అందువలన ఖరీదు ఎక్కువ అయినప్పటికీ, నిర్లక్ష్యం చేయకుండా, కనీసం అప్పుడప్పుడైనా కాలీఫ్లవర్‌ను కూర రూపంలో గాని, మరొక విధంగా కానీ తీసుకోవటం మంచిది. 100గ్రా కాలీఫ్లవర్‌లో పోషక విలువలు ఈ విధంగా ఉంటాయి. పిండిపదార్థాలు-5.3గ్రా. క్రొవ్ఞ్వ పదార్థాలు 0.4గ్రా, మాంసకృత్తులు-3.5గ్రా, సున్న(కాల్షియం)-30మి.గ్రా, భాస్వరం.- 60మి.గ్రా, మెగ్నీషియం -20మి.గ్రా ఇనుము-1.3మి.గ్రా ఉప్పు-12మి.గ్రా పొటాషియం-285మి.గ్రా పీచుపదార్థం-1.2మి.గ్రా నిజానికి, క్యాబేజి కన్నా విలువైన పోషకాలను కలిగి ఉన్నది కాలీఫ్లవర్‌. విటమిన్‌ బి6, విటమిన్‌ సి, ఫోలేట్‌ ఆరోగ్యదాయకమైన ఎన్నో పైటో కెమికల్స్‌ పుష్కలంగా ఉంటాయి. ఇది క్యాన్సర్‌ నిరోధక కాయగూరలలో రారాజు. క్యాన్సర్‌ను నిరోధించే బయో ఫ్లావనాయిడ్స్‌ కాలీఫ్లవర్‌లో పుష్కలంగా ఉంటాయి. పీచుపదార్థం ఎక్కువ. అందువలన మల విసర్జన సాఫీగా జరగటానికి, వ్యర్థ పదార్థాల బహిష్క రణకు దోహద పడుతుంది. వంధ్యత్వాన్ని పోగొడుతుంది. రేచీకటిని, చిన్న వయసులో జుట్టు తెల్లబడటాన్ని, ఊడిపోవడాన్ని నివారిస్తుంది.

మీ ఆహారంలో పోషక విలువలు ఉన్నాయా?

మనం తీసుకునే ఆహారంలో జాగ్రత్తలు తీసుకోకపోతే వ్యాధులు కొని తెచ్చుకున్నట్టే అవుతుంది. ఏదైనా సరే ప్రతిరోజు మనం తినే తిండిలో సమతుల్యత లేకపోతే చిక్కుల్లో పడ్డట్టే. అందుకేనేమో ఇప్పుడు పోషకవిలువల గురించి ప్రచారం చేస్తున్నారు. ఏ వయసులో ఏం తీసుకోవాలో, ఏ సమయానికి ఏది తీసుకోవాలనేది కూడా ఇప్పుడు బాగా ప్రాధాన్యతను సంతరించుకుంది. కలగలసిన ఆహారం ఇప్పుడు శరీరానికి బలంతో పాటు ఆయుష్షుకు చేదోడుగా కూడా ఉంటోందని చెబుతున్నారు ఆహార నిపుణులు. కొన్ని పోషక విలువలు; కొన్ని ఆహార పదార్థాల్లోనే ఉంటాయి. అవేమిటో ఒక్కసారి చూద్దాం... బీన్స్‌: ఫైబర్‌ సమృద్ధిగా ఉంటుంది. కొలెస్ట్రాల్‌ తక్కువ మోతాదులో ఉండి జీర్ణక్రియకు బాగా ఉపయోగపడుతుంది. మెదడుకు కావాల్సిన శక్తిని కూడా ఇస్తుందని డాక్టర్లు చెబుతున్నారు. జ్ఞాపకశక్తిని పెంపొందించడంలో అద్భుతంగా ఉపయోగపడుతుంది. విటమిన్‌ బి1 ఇందులో సమృద్ధిగా ఉంటుంది. మధుమేహం ఉన్నవారికి ఎన్నో రకాలుగా ఉపయోగపడుతుందని చెబుతున్నారు డాక్టర్లు. యాపిల్‌: ఇందులో కూడా ఫైబర్‌ సమృద్ధిగా దొరుకుతుంది. అయితే కాసిన్ని కార్బొహైడ్రేట్స్‌ కూడా ఉంటాయి. అయితే తక్కువ మోతాదులో ఉంటాయి. ఇందులో కేన్సర్‌ను నివారించేందుకు అవసరమైన యాంటీ ఆక్సిడెంట్స్‌ ఉంటాయి. ఇవి కూడా బ్రెయిన్‌ పనిచేసేందుకు సహకరిస్తాయి. ముఖ్యంగా అల్జీమర్‌ వ్యాధి రాకుండా యాపిల్‌ బాగా ఉపయోగపడుతుంది. ఊపిరితిత్తులకు కావలసిన ఆక్సిజన్‌ను కూడా సప్లయ్ చేస్తుంది. ఆరెంజ్‌: ఫోలేట్‌ థియామిన్‌ అనే పదార్థం ఇందులో బాగా లభిస్తుంది. నరాలకు అవసరమయ్యే కెరొటి నాయిడ్‌ అనే పదార్థం సమృద్ధిగా లభిస్తుంది. ఎర్రరక్త కణాల అభివృద్ధికి ఇది బాగా తోడ్పడుతుంది. ముఖ్యంగా కొలెస్ట్రాల్‌ను వృద్ధికాకుండా ఆపుతూ ఉంటుంది. మెదడుకు కావలసిన యాంటి ఆక్సిడెంట్స్‌ను అందిస్తూనే, విటమిన్‌ సిని సమృద్ధిగా పంపిణీ చేస్తుంది. ఎర్రద్రాక్ష: ఆంథోసియానిన్‌ అనే పదార్థం లభిస్తుంది. ఈ పదార్థం కేన్సర్‌ నిరోధకానికి బాగా ఉపయోగపడుతుంది. గుండె, మెదడుకు సంబంధించిన కొన్ని రకాల వ్యాధులను రాకుండా కాపాడేందుకు ఈ ఎర్రద్రాక్ష బాగా ఉపయోగపడుతుంది. చేపలు: మాంసాహారంలో ఇంతకు మించిన మంచి ఆహారం మరెందులోనూ లేదు. కొలైన్‌, కొబాలమిన్‌ (బి12), నియాసిన్‌ (బి8), ఒమేగా-3, ఫాటీయాసిడ్స్‌ లాంటి వాటిని ఉత్పత్తి చేస్తాయి. గుండెకు సంబంధించిన జబ్బులను నివారిస్తాయి. నరాల ఫంక్షనింగ్‌కు, డిప్రెషన్‌ నివారణకు చేపల ఆహారం చాలా మంచిది. పైరిడాక్సిన్‌ (బి6) అనే పదార్థాన్ని విడుదల చేస్తాయి. వ్యాయామం చేస్తున్న వారికైతే ఇవి ఖచ్చితంగా ఉండాల్సిందే. వ్యాయామం లేనివారైనా సరే ఈ పదార్థాలను తీసుకోవడంలో అజాగ్రత్త వహించవద్దు. ఆహారంలో సమతుల్యత పాటించినప్పుడే ఆరోగ్యం మన సొంతమవుతుంది.

 

ఆలివ్‌ అందాలు...

పొడిచర్మం కలవారి పాలిట ఆలివ్‌ ఆయిల్‌ ఒకవరమే. దీనితో చర్మం పైన మర్దనా చేయడం ద్వారా, ఆహారంగా లోపలికి తీసుకోవటం ద్వారా పిల్లల చర్మం అందంగా, ఆరోగ్యంగా మృదువుగా కాంతివంతంగా మారుతుంది. చర్మం, జుట్టు, గోళ్లు, చిగుళ్లు వీటిని ఆరోగ్యవంతంగా ఉంచడంలోనూ ఆలివ్‌ ఆయిల్‌ తన ప్రభావాన్ని చూపుతుంది. పిల్లలకు ఆలివ్‌ ఆయిల్‌తో ప్రతిరోజూ మర్దనా చేయవచ్చు. ఈ నూనెకు ఉన్న సౌలభ్యం ఏమిటంటే దీనితో స్నానానికి ముందు లేదా తరువాత ఎప్పుడైనా మసాజ్‌ చేయవచ్చు. పాపాయికి స్నానం చేయించే ముందుగానే శరీరానికి సరిపడా ఆయిల్‌తో చక్కగా మసాజ్‌ చేయాలి. తరువాత స్నానం చేయించాలి. లేదా వేడినీళ్లతో స్నానం చేయించి ఆ ఒంటికే ఆలివ్‌ ఆయిల్‌తో మసాజ్‌ చేయటం వలన పిల్లలు ఆదమరిచి చక్కగా నిద్రపోతారు. ఆలివ్‌ ఆయిల్‌ వారి శరీరాల్లోకి చక్కగా ఇంకుతుంది. ఏ మాత్రం జిడ్డు అనిపించకుండా చర్మం మృదువుగా మారుతుంది.

ప్రొటీన్లతో పోషకాల అనాస...

చూడడానికి ముళ్లులాగా ఉండే పండు పైనాపిల్‌. ఆకారం బాగోకపోయినా దానిలో చాలా పోషకాలున్నాయని నిపుణులు చెబుతున్నారు. మరి ఆ వివరాలేమిటో తెలుసుకుందామా! - పైనాపిల్‌లో బ్రొమిలైన్‌ అనే ప్రొటియోలిటిక్‌ ఎంజైమ్‌ ఉంటుంది. తీసుకున్న ఆహారాన్ని ప్రొటీన్లుగా జీర్ణం చేయడమే దీని పని. అందుకే అజీర్తికి ఇది మంచి మందు. - సైనసైటిస్‌, గొంతునొప్పి, కీళ్లనొప్పులు, పంటి వ్యాధులతో బాధపడేవారిలో వాపులూ, మంటలూ నొప్పులూ ఎక్కువ. పైనాపిల్‌ తింటే ఇవన్నీ తగ్గుముఖం పడతాయి. కారణం ఈ బ్రొమిలైన్‌కి యాంటీ ఇన్‌ఫ్లమేటరీ గుణాలు కూడా మెండు. - అయితే దీన్ని ఉదయం భోజనం అయిన తరువాత అంటే మధ్యాహ్న సమయంలో తింటే మంచిది. - ఇందులోని ఎంజైమ్‌ రుమటాయిడ్‌ ఆర్థ్రరైటిస్‌ కారణంగా దెబ్బతిన్న కణజాలాన్ని త్వరతిగతిన బాగుచేస్తుంది. మధుమేహం కారణంగా ఏర్పడే పుండ్లనీ ఇతరత్రా గాయాల్నీ కూడా త్వరగా తగ్గిస్తుంది. - ఇది కడుపులోని పురుగుల్నీ చంపేస్తుంది. ఇందులోని రసాయనాలు మూత్రపిండాల్ని ప్రేరేపించి శరీరంలో మలినాలు తొలగిపోయేలా చేస్తాయి. - హృద్రోగ బాధితులా...అయితే పైనాపిల్‌ను రోజూ రెండు ముక్కల చొప్పున తింటే బెస్ట్‌. ఎందుకంటే ఇది రక్తం గడ్డకట్టడాన్ని అడ్డుకుంటుంది. అంటే రక్తనాళాల్లోంచి గడ్డల్ని తొలగించి ప్రసారాన్ని మెరుగుపరుస్తుంది. అయితే హీమోఫీలియా మూత్రపిండాలు, కాలేయ వ్యాధులతో బాధపడేవాళ్లు మాత్రం దీన్ని తినకపోవడమే మంచిది. రక్తం గడ్డకట్టడాన్ని నిరోధించడం దీని సహజ స్వభావం కదా. అందుకే. - గొంతునొప్పి, బ్రాంకైటిస్‌ వంటి శ్వాసకోశ వ్యాధుల్నీ పైనాపిల్‌ తగ్గిస్తుంది. రక్తహీనతతో బాధపడేవాళ్లకి కూడా ఇది చక్కగా పనిచేస్తుంది. మతిమరపు, డిప్రెషన్‌లనీ తగ్గిస్తుంది. - పైనాపిల్‌లోని సి-విటమిన్‌ బ్యాక్టీరియాతో పోరాడి చిగుళ్ల సమస్యను నివారిస్తుంది. - వృద్ధాప్యంలో వచ్చే కంటి సమస్యలకు పైనాపిల్‌ను మించిన ఔషధం లేదు. ఇందులోని కొన్ని కణాలకి కేన్సర్‌లతోనూ పోరాడగల శక్తి ఉంది. - ఎముకలకు ఇది బలం. పెరిగే పిల్లలకూ, వృద్ధులకూ ఇది చాలా మంచిది. దగ్గుకీ, జలుబుకీ ఇది మంచి మందు. ఇందులో బ్రొమిలైన్‌ దగ్గు రాకుండా చేస్తుంది. - చెట్టు నుంచి కాయను తెంపిన తరువాత ఇది పండదు. కాబట్టి పండిన తరువాతే వీటిని కోస్తుంటారు. బాగా పండిన పైనాపిల్‌కు గుర్తేమిటంటే పైనుంచే ఆకుల ముచ్చికను తీయగానే వచ్చేస్తుంది. పండిందా లేదా అనడానికి గుర్తుగా వాసన వస్తే చాలు. - పండు నెత్తిమీద కుచ్చులా ఉండే ఆకులు పసుపు రంగులోకి మారినా ఒంటిమీదుండే కల్లు మరీ ముదురురంగులో ఉన్నా పై తొక్కమీద ముడతలు కనిపించినా పండు పాడయిందని గుర్తించాలి. - ఇది గది ఉష్ణోగ్రత దగ్గర ఎక్కువరోజుల నిల్వ ఉండదు. త్వరగా కుళ్లిపోతుంది. కాబట్టి కొన్న వెంటనే తినడమే మంచిది. - చాలామంది పైనాపిల్‌ను ఫ్రిజ్‌లో పెడుతుంటారు. కానీ అరటిపండ్లలానే దీనికి ఫ్రిజ్‌ పడదు. బయట ఉంచడమే మంచిది. - తొక్కుతీసిన పైనాపిల్‌ను వెంటనే గాలి చొరని డబ్బా లేదా ప్లాస్టిక్‌ కవర్‌లో ఉంచి ఫ్రిజ్‌లో పెడితే నాలుగైదురోజుల పాటు నిల్వ ఉంటుంది. జ్యూస్‌ని ఫ్రిజ్‌లో పెడితే రుచి మారుతుంది. దానికన్నా ముక్కలుగా నిల్వ చేయడమే మంచిది. కేనింగ్‌ లేదా ప్రాసెస్‌ చేసినవయితే ఏడాది వరకూ నిల్వ ఉంటాయి.