వెలుగుల పందిరి-ఫ్యాషన్

శ్రీరస్తూ, శుభమస్తూ... అంటూ పెళ్లిపందిరి కళ్యాణకాంతులకు సిద్ధమయ్యే శుభముహూర్తాన మగువల మేనిపై సరికొత్తగా సింగారాలు ఒలకబోసేవి ముచ్చటైన కంచిపట్టుచీరలు. అపరంజి బొమ్మ నుదుటన బాసికం కట్టే సమయాన నునుసిగ్గుల మెరుపులు అద్దుకొని పారాణి పాదాలపై రెపరెపలాడేవి కంచిపట్టుచీరలు. అనురాగాల బంధానికి ఆహ్వానం పలుకుతూకోటికలల జీవితానికి బంగారపు సొబగులు అద్దే కంచిపట్టు చీరలు ఈవారం... 1- ఆకాశానికి వంగపండు రంగు అంచును జత చేసినట్టు తలపిస్తోంది ఈ స్వచ్ఛమైన కంచిపట్టుచీర. తారకలను పోలిన కుందన్స్, మెరుపులను జరీగా చేసి అల్లిన జర్దోసీ వర్క్ ఈ చీర కు వినూత్నమైన కళను తీసుకువచ్చాయి. ఈ చీర సింగారం వేడుకలకే వేల కాంతులను తీసుకువస్తుంది. 2- ఆకుపచ్చ, వంగపండు రంగుల కాంబినేషన్‌తో బ్రైట్‌గా వెలిగిపోతోంది ఈ స్వచ్ఛమైన కంచి పట్టు. చీరంతా జరీ కాంతులతో కనువిందు చేస్తోంది. సెల్ఫ్ బ్రొకేడ్, పువ్వుల డిజైన్, ఆకుపచ్చని అంచు, పల్లూ ఈ చీరను ప్రత్యేకంగా చూపుతున్నాయి. 3- గుమ్మడి పువ్వులాంటి అమ్మడి కన్నుల్లో కళ్యాణకాంతులను విరజిమ్ముతోంది ఈ లేత గులాబీ రంగు కంచిపట్టు చీర. అదే రంగు అంచు మరింత వన్నెలను అద్దింది. ఆ అంచుమీద కుందన్స్ మెరుపులు, బంగారు తీగెలతో అల్లినట్టున్న మామిడిపిందెల డిజైన్ పెళ్లి పందిరికి కోటికాంతులను మోసుకొస్తుంది.  4- పసుపు, కుంకుమ, ఆకుపచ్చ రంగులతో అలరారుతున్న కంచిపట్టు చీర ఇది. సెల్ఫ్ జకార్డ్ డిజైన్‌తో ఈ చీర రిచ్‌గా కనిపిస్తోంది. విశాలమైన బార్డర్, పల్లూ ఈ చీర ప్రత్యేకతలు.