మీ అనారోగ్యానికి భరోసా ఈ పోపుల పెట్టే...

మన వంటగది కేవలం వండివార్చాడానికి మాత్రమే కాదు..ఇది అనేక ఔషధాల నిలయం. దేహంలో చోటు చేసుకునే ఎన్నో అనారోగ్యాలకు నివారణకు, చికిత్సలూ అన్నీ పోపుదినుసులతోనే చేయవచ్చు. ఔషధాల నిలయమైన మన పోపుల పెట్టెతో తగ్గించుకునే కొన్ని అనారోగ్య సమస్యలను తెలుసుకుందాం..

వంట గదిలో ఉండే పదార్థాల విలువ తెలుసుకుంటే అనారోగ్యం దరికే చేరదు. కానీ మనకంత ఆవసరం వుండదు. వంట చేయాలంటే చాలు మన చేతిలో వుండేది పోపులపెట్టె. ప్రతినిత్యం పోపులపెట్టెను, అందులోని దినుసులను వాడుతూనే వుంటాం. కానీ ఏదో పూర్వకాలం నుండీ పెద్దలు వాడుతున్నారు కనుక వాడతాం తప్ప పోపులపెట్టెలోని సరుకుల గురించి, వాటిలో దాగున్న ఔషధ గుణాల గురించి పెద్దగా పట్టించుకోం. ఒకసారి ఆ సుగుణాలను తెలుసుకుంటే పోపు దినుసుల వాడకాన్ని మరింత పెంచుతాం. ఏదో మొక్కుబడిగా కాకుండా గుర్తుంచుకుని మరీ శ్రద్ధగా కూరల్లో వేస్తాం. ఆరోగ్యాన్ని పదిలంగా కాపాడుకుంటాం. మరవేంటో చూద్దామా?!

పోపుల పెట్టె కాదు...ఆరోగ్యపు చిట్ట...!

వెల్లుల్లి గుండెకు నేస్తం: పచ్చివెల్లుల్లి తినడం వల్ల రక్తపోటు అదుపులో ఉంటుంది. వెల్లుల్లిలో యాంటీ ఇన్‌ఫ్లమేటరీ గుణాలు కీళ్ళనొప్పుల్ని తగ్గిస్తాయి. ఆక్సీకరణ నుంచి శరీరంలోని కొవ్వును నివారించే కార్పినోజెనిక్ మిశ్రమ పదార్థాలు ఏర్పడే యాంటీ ఆక్సిడెంట్ ఇందులో మెండుగా వున్నాయి.

 

అల్లం పైత్యానికి విరుగుడు: అజీర్ణ వ్యాధులకు అల్లం అద్భుతంగా పనిచేస్తుందని, ఉదర సంబంధ వ్యాధులకు అల్లాన్ని మించిన ఔషధం లేదని ఆయుర్వేదం గట్టిగా చెబుతోంది. వికారం, వాంతులు, విరోచనాలకు చెక్ పెడుతుంది. గర్భవతులలో ఉదయం పూట వికారాన్ని, కెమోథెరపీతో పాటు ఎన్నో కారణాలవలన వచ్చే కడుపునొప్పిని అల్లం నివారిస్తుంది.

 

కుంకుంపువ్వు అందం ఆరోగ్యం: ఇది చాలా ఖరీదైన సుగంధ ద్రవ్యం. దేశ విదేశాలలో ఆహార పదార్థాలలో రుచి, రంగు, సువాసనకోసం వాడే కుంకుమపువ్వులో క్యాన్సర్ నిరోధక గుణాలు వున్నాయి.

చక్కెరను నియంత్రించే దాల్చిన చెక్క: దాల్చిన చెక్కలో ప్రోటీన్లు, పీచు, ఐరన్, సోడియం, విటమిన్ సి ఇంకా ఎన్నో పోషక విలువలు ఉన్నాయి. దీనిలోని ఔషధ విలువల వల్ల శరీరానికి ఎంతో మేలు జరుగుతుంది. ఇది రక్తంలో చక్కెర స్థాయిపై ప్రభావం చూపుతూ, కొలెస్ట్రాల్, ట్రెగ్లీసెరైడ్ స్థాయిని తగ్గిస్తుందని అధ్యయనాలు పేర్కొంటున్నాయి.
 

లవంగాలు శ్వాసకు మేలు: లవంగాలలోని యాంటీ బాక్టీరియల్ గుణాలు దంత రక్షణనిస్తాయి. నోటిని, శ్వాసను తాజాగా వుంచుతాయి. హృదయానికి ఆరోగ్యాన్నిస్తాయి. యాంటిసెప్టిక్, యాంటీబయోటిక్ ఔషధాలలో లవంగాలను ఉపయోగిస్తారు.

 

పచ్చి ఏలకులు: ఊపిరితిత్తులలో కఫాన్ని కరిగించి, శ్లేష్మాన్ని తొలగించే శక్తి ఏలకులకు ఉంది. శ్వాస సంబంధిత ఇబ్బందులతో బాధపడే పిల్లలకు ఏలకులు వేసిన పాలను తాగించాలి. ఇవి జీర్ణక్రియ వ్యవస్థపై చక్కగా పనిచేస్తుంది. అజీర్ణం, కడుపు ఉబ్బరాన్ని తొలగిస్తుంది.

ఆవాలు: ఆవాలు గుండెను ఆరోగ్యంగా ఉంచుతాయి. శరీరానికి కావలసిన విటమిన్లు వీటిలో ఉన్నాయి. కీళ్ళనొప్పులు, కండరాల నొప్పులు తగ్గిస్తుంది. శ్వాస అవరోధాలను దూరం చేస్తుంది.

 

జీర్ణశక్తికి జీలకర్ర: జీర్ణశక్తిని బాగా పెంచుతుంది. దీనిలోని క్యూమిక్ డీహైర్ అనే పరిమళం లాలాజల గ్రంధులను క్రీయాశీలం చేస్తుంది. ఆకలిని పుట్టిస్తుంది. శ్వాసక్రియ వ్యవస్థను ఎలాంటి అంటురోగాలు సోకకుండా ఆరోగ్యంగా వుంచుతుంది.

 

 

మిరియాలు: ఘాటుగా వుండి నాలుకను చురుక్కుమనిపించే మిరియాలు జీర్ణక్రియకు తోడ్పడతాయి. ఆహారం తేలికగా జీర్ణం కావడానికి హైడ్రోక్లోరిక్ యాసిడ్‌ను విడుదల చేయమని ఉదరాన్ని ప్రేరేపిస్తాయి. బ్లాక్ కాఫీలో మిరియాలపొడి వేసుకుని తాగితే ఋతుక్రమ సమయంలో ఇబ్బందుల నుంచి ఉపశమనం ఇస్తుంది.

మెంతులు: పచ్చిమెంతుల పొడి ప్రతిరోజు 10 లేదా 15 గ్రాములు తింటే మధుమేహం పూర్తిగా అదుపులో ఉంటుంది. ప్రసవం అనంతరం వచ్చే నొప్పులు మెంతులు వేయించి బెల్లంతో కలిపి ఇస్తే నొప్పులు తగ్గుతాయి. బాలింతలకు పాలు బాగా పడతాయి. మెంతులలో చక్కెర కలిపి తినిపిస్తే బరువు తగ్గిన పిల్లలు మామూలుగా తయారవుతారు. మెంతులు నూరి తలకు పట్టిస్తే చుండ్రు పోవడమే కాక శిరోజాలు బాగా పెరుగుతాయి.

 

గసగసాలు: గసగసాలను ఒక గంట వేడినీటిలో నానబెట్టి తాగితే తలనొప్పి తగ్గుతుంది. మజ్జిగలో కలిపి తాగితే నీళ్ల విరోచనాలు తగ్గుతాయి. గొంతు వాచి నొప్పిగా ఉన్నప్పుడు ఈ కషాయం పుక్కిలిస్తే వాపు నొప్పి తగ్గిపోతుంది.

ధనియాలు: కాచి చల్లార్చిన నీటిలో ధనియాలపొడివేసి రెండు గంటలు నానబెట్టి తాగిస్తే విషజ్వరాలు ఇట్టే తగ్గుతాయి. జలుబు, దగ్గులకు ధనియాల చారు మంచిది.