పిల్లల మనోభావాల వెనుక...

పిల్లలకు విద్యాబుద్ధులు చెప్పించడం, పాఠశాలకు పంపించడం, తిండి, బట్ట ఇవ్వడంతో తల్లిదండ్రుల బాధ్యత తీరదు. పిల్లలకి క్రమశిక్షణ, సత్ప్రవర్తన నిజాయితీ అయిన జీవితం అలవడాలంటే, తల్లిదండ్రులు క్షణక్షణం తాము ఏమి మాట్లాడుతున్నారో, ఎలా ప్రవర్తిస్తున్నారో చూసుకోవాలి. ఈ రోజులలో పిల్లలు తల్లిదండ్రుల మాట వినడం లేదని ప్రతిచోటా వినవస్తుంది. ఇందుకు గల కారణం ఏమిటని ఆలోచిస్తే తల్లిదండ్రులలోనే లోటు ఉన్నదని తేలుతుంది. - తల్లిదండ్రులు వాళ్ల పెద్దల యెడల ఎలా ప్రవర్తిస్తున్నారు అనే విషయాన్ని పిల్లలు క్షుణ్ణంగా పరిశీలిస్తారు. నాయనమ్మను, తాతయ్యను నిర్దాక్షిణ్యంగా దూషించి, ఇంట్లోంచి నెట్టివేస్తే తల్లిదండ్రులకు తమ పిల్లల ప్రవర్తన కూడా అలాగే ఉంటోందని ధ్యాస ఉండాలి. - అవసరం కొద్దీ, ఇబ్బంది ఇరకాటం కలిగే సందర్భాల నుండి బయటపడి తప్పించుకోవడానికి తల్లిదండ్రులు అబద్ధాలు చెపితే వారి పిల్లలు కొంత గమనించి అదే అనుకరించుతారని గ్రహించాలి. - పిల్లలను తల్లిదండ్రులు ఆప్యాయంగా మాట్లాడాలి. మనసారా దగ్గరకు తీసుకోవాలి ప్రేమతో పలకరించాలి. పిల్లలను అక్కున చేర్చుకోవాలి. ప్రేమ, అనురాగం, ఆప్యాయతలను పొందాలి. - రోజుకు ఒకసారి కుటుంబ సభ్యులంతా కూర్చుని మాట్లాడుకునే అలవాటు చేసుకోవాలి. ఆ రోజు జరిగిన సంఘటనలు, ఆలోచనలు మనసులోని భావనలను పంచుకోవాలి. - పిల్లల ఆసక్తి, శక్తి దృష్టిలో పెట్టుకుని చదివించాలి. కాని తల్లిదండ్రుల నిర్ణయాలు తీసుకుని వారి ఆసక్తిని పిల్లలమీద రుద్ది వాళ్లే నిర్ణయాలు తీసుకోవడం మంచి విధానం కాదు. - పిల్లలతో ఎక్కువకాలం గడపాలి. వారంలో ఒకసారైనా స్నేహితులను, బంధువులను కలిసి ఆత్మీయతను పంచుకోవాలి. - ప్రపంచమంతా ఒకే కుటుంబం అనే భావన పిల్లలలో కలిగించాలి. ఉమ్మడి కుటుంబ వ్యవస్థ పట్ల పిల్లల్లో మంచిగా అవగాహన కలిగించాలి. - పిల్లలకు మంచిగా బతకడానికి అవసరమైన సంస్కారం, వ్యక్తిత్వం, మంచి ఆలోచనలు, మానవత్వపు విలువలు, మాట్లాడే విధానం నేర్పాలి. కలిసిమెలిసి జీవించడం, పెద్దవాళ్లను గౌరవించడం, తోటివారిని ప్రేమించడం తెలపాలి. - దైవచింతన, శాస్త్రాధ్యయనం పెద్దలు చేస్తే పిల్లలకు సునాయాసంగా అలవడుతుందని తల్లిదండ్రులు గ్రహిస్తే పిల్లలను మంచి మార్గంలో పెట్టడానికి తేలికమార్గం వారికి లభిస్తుంది. - పిల్లలు మాతృభక్తి, పితృభక్తి, గురుభక్తి, దైవభక్తి, దేశభక్తి కలిగి ఉండే విధంగా తల్లిదండ్రులు శ్రద్ధచూపాలి. - సంకల్పబలం, సాధనాశక్తి, నిత్యకృషి, దృఢనిశ్చయం వంటి గుణాల పిల్లల్లో మానసిక శక్తిని పెంచుతాయి. పెద్దల పట్ల గౌరవం, వారి మాటపై విశ్వాసం, సక్రమ ప్రవర్తన పిల్లల శక్తిని మరింత ద్విగుణీకృతం చేస్తుంది. - పిల్లలకు అమ్మమ్మ, నాన్నమ్మ, తాతయ్య గారాబాలు, అమ్మానాన్న చిరుకోపాలు అన్న, అక్క, తమ్ముడు, చెల్లెళ్లతో హాయిగా కాలం గడిపే వాతావరణం కల్పించాలి. పెద్దవాళ్ల విషయంలో ఆప్యాయంగా పలుకరించే మనుషులు అందరూ కలిసి కూర్చుని నిష్కల్మషంగా, నిష్కర్షగా చర్చించుకునే అవకాశం పిల్లలకు కల్పించాలి. - పిల్లలకు తల్లిదండ్రులు ఆదర్శంగా ఉంటే పిల్లలలోని తప్పులను నూరుసార్లు సరిదిద్దగలం. కటువైన మాటలతో వారిని సరిదిద్దలేము. సాంప్రదాయబద్ధంగా కుటుంబంలో ఉన్న మానవ సంబంధాల పట్ల పిల్లలకు చక్కని అవకాశాన్ని కల్పించండి. - తల్లిదండ్రులు తమ పిల్లల పట్ల గౌరవ మర్యాదలతోను, నిజాయితీ, ఉదార స్వభావంతోనూ వ్యవహరించాలి. - పిల్లలకు సన్మార్గాన్ని బోధించే సమయంలో ప్రతి తల్లీ, ప్రతి తండ్రీ చక్కని గైడ్‌లా వ్యవహరించాలి. సహజంగానే తల్లిదండ్రులు పిల్లలకు ఆదర్శపూర్వకమైన వ్యక్తిగా కన్పించాలి. పిల్లల పెంపకంలో కూడా ఒక మంచి రోల్‌మోడల్‌గా కన్పించాలి. - నేర్చుకోవటం పట్ల మీరు మీ పిల్లవాడికి ఒక పాజిటివ్‌ వైఖరిని అందివ్వండి. కొత్త విషయాలను కనుగొనడం, కొత్త నైపుణ్యాలను ప్రదర్శించడం, కొత్తకొత్త ఆలోచనలు చేయడం నేర్పించండి. నేర్చుకోవడం అంటే ఒక సరదా అయిన అనుభవంగా మలచండి. - తల్లిదండ్రుల మధ్య అనురాగం, ఆత్మీయత, ఒకరిపట్ల ఒకరికి గౌరవం పుష్కలంగా ఉండటం గమనించే పిల్లలు సహజంగానే ప్రేమైక భావనలను ఏర్పరుచుకుంటారు. అన్యోన్యతను చూడలేని దంపతులు ఉత్తమ పేరెంట్‌ కాలేరు. - పిల్లల్ని అతిగా విమర్శించకండి. వారి అత్యున్నత భావాలను దెబ్బతీయకండి. పిల్లలకు మీ సమక్షంలో భద్రతా భావనల్ని కల్పించండి. వారి ఎదురుగా మీరు కీచులాడుకోకండి.