చిట్టికథ
 అర్జునుడు మహా పరాక్రమశాలి. విలువిద్యలో ఆరితేరినవాడు. దుష్టులు, దుర్మార్గులు అయిన కౌరవులపై గెలుపొందాలంటే ఎన్నో శస్త్రాస్త్రాలు అవసరం. అన్నింటిలోనూ పాశుపతాస్త్రం చాలా శక్తిమంతమైనదని, అది పరమేశ్వరుడి వద్ద తప్ప వేరెవరి వద్దా ఉండదు కాబట్టి ఆయన్ని ప్రసన్నం చేసుకోవాలని తపస్సు చేయడం ప్రారంభించాడు. అర్జునుడి తపస్సుకు మెచ్చిన శివుడు అతనికి పాశుపతాస్త్రాన్ని ప్రసాదించాలనుకున్నాడు. అయితే అర్జునుడి పరాక్రమాన్ని కూడా పరీక్షించాలనుకున్నాడు. పరమేశ్వరుని ఆజ్ఞతో మూకాసురుడనే రాక్షసుడు పందిగా మారి అర్జునుడి మీదికి వచ్చాడు. అర్జునుడు ఆ పంది మీదికి బాణాన్ని ప్రయోగించాడు. సరిగ్గా అదే సమయానికి ఓ కిరాతకుడు అంటే బోయవాడు వెనకాలనుంచి ఆ పందిమీద బాణం వేశాడు. పంది చచ్చిపోయింది. దాన్ని తీసుకెళ్లడానికి బోయవాడు రాగానే ఏ జీవిపైనైనా సరే, వెనకనుంచి బాణం వేయడం తప్పంటూ అర్జునుడు అతణ్ని మందలించాడు. బోయవాడు కోపంతో మండిపడి దుర్భాషలాడాడు. అర్జునుడికీ కోపం వచ్చింది. ఇద్దరూ కలబడ్డారు. అర్జునుడి పట్లన్నింటినీ కిరాతకుడు చిత్తు చేసేస్తున్నాడు. ఎంతగా ప్రయత్నించినప్పటికీ ఆ కిరాతకుణ్ని జయించలేకపోతుండంతో ఎదుటివాడు సామాన్యుడు కాడని గ్రహించాడు అర్జునుడు. దాంతో ఆ బోయవాడి కాళ్లు పట్టుకున్నాడు. వెంటనే ఆ బోయవాడు మాయమై, శివుడు పార్వతీ సమేతంగా అర్జునుడికి దర్శనమిచ్చాడు. పరమేశ్వరుణ్ణి చూసిన అర్జునుడు ఆనందంతో సాష్టాంగ నమస్కారం చేసి, స్తోత్రం చేశాడు. శివుడు అర్జునుని బలపరాక్రమాలను మెచ్చుకుని, అతను కోరిన పాశుపతాస్త్రాన్ని ప్రసాదించాడు. శివుడికి భక్తులంటే అంత ప్రేమ! - బాచి |
No comments:
Post a Comment