గొప్ప దానం ‘ర‌క్తదానం’

ప్రతి జీవికి రక్తం ప్రాణాధారం. లోకంలో నీళ్ళు లేకపోతే ఎలా మనుగడ కష్టమౌతుందో, శరీరంలో రక్తం తక్కువైతే ప్రాణానికే ముప్పు. సమయానికి రక్తం దొరకక పోవడం వల్ల ప్రతిరోజు ఎంతోమంది ప్రాణాలు పోగొట్టుకుంటున్నారు. ప్రతి రెండున్నర సెకన్లకు ఒకరికి రక్తం అవసరం పడుతోంది. ప్రతి రక్తపు బొట్టు మరొకరి ప్రాణానికి ఆధారమవుతోంది. వందలో ఒకరు రక్తం దానం చేస్తే చాలు మనిషి ప్రాణాలను కాపాడుకోవచ్చు. కానీ రక్తదానం అవసరానికి సరిపోయేంతగా జరగడంలేదు. అందువల్ల రక్తం అవసరమైనపుడు చాలా ఇబ్బంది పడాల్సి వస్తోంది.
అన్ని దానాల్లోకెల్లా మిన్న రక్తదానం. ఎందుకంటే ప్రాణాపాయస్థితిలో వున్న వ్యక్తికి రక్తం ఇచ్చి ప్రాణం కాపాడడమంటే అంతకన్నా పరోపకారం ఏముంటుంది? అన్నదానం, విద్యాదానం మొదలైన… ఏ దానం చేయాలన్నా ప్రాణమున్న మనిషికే చేస్తాం. అలాంటి ప్రాణాలనే నిలబెట్టే మహత్తర దానం రక్తదానం. రక్తదానం సేవ మాత్రమే కాదు, ప్రతి పౌరుడు బాధ్యతగా భావించాలి. సమయానికి రక్తం అందక ఎంతోమంది ప్రాణాలు కోల్పోతున్నారు. మన దేశంలో ఏటా సుమారు 80 లక్షలకు పైగా యూనిట్లు రక్తం కొరత ఉందని సర్వేలు వెల్లడిస్తున్నాయి.
ప్రస్తుత పరిస్థితుల్లో ప్రభుత్వ, ప్రయివేటు ఆస్పత్రులలోనైనా రక్తం దొరకటం కొంచెం కష్టంగానే ఉంటోంది. ఇక అరుదైన గ్రూప్ రక్తం అయితే చెప్పాల్సిన పనిలేదు. డోనర్స్ కోసం వెతుక్కోవల్సిందే. దాంతో ఆస్పత్రుల్లో రక్తం అవసరం అయితే వారి బంధువుల్లో ఒకరు బదులుగా రక్తం ఇస్తేనే బ్లడ్ బ్యాంకులో వారికి అసవరం అయిన రక్తం ఇస్తామని నిబంధన పెట్టారంటే సమస్య తీవ్రత ఎంతగా ఉందో అర్థం చేసుకోవచ్చు. 18 నుంచి 60 ఏళ్ల వరకు ఆరోగ్యంగా ఉన్న ఎవరైనా ప్రతి మూడు నెలలకొక సారి రక్త దానం చేయవచ్చు. ఈ లెక్కన నిరంతరాయంగా 42 సంవత్సరాల పాటు రక్త దానం చేస్తే ఒక్కొక్కరు సుమారు 500 మంది ప్రాణాలు కాపాడిన వారవుతారు. ఒకసారి రక్తన్ని దానం చేసి ముగ్గురి ప్రాణాలు కాపాడవచ్చు.
రక్తం తయారు చేసే పదార్థం కాదు కాబట్టి… కేవలం మానవత్వం మీద ఆధారపడి ఉండే ఒకే ఒక్క దానం రక్తదానం. రక్తదానం చేయటం ద్వారా మరొకరికి ప్రాణదాత అవుతారు.