winter skin care

నా వయసు 42. ఈ మధ్య చర్మం ముడతలు పడటం గమనిస్తున్నాను. చలికాలంలో ఈ సమస్య మరీ ఎక్కువ. ముడతల నివారణకు తీసుకోవాల్సిన జాగ్రత్తల గురించి తెలియజేయండి.
- ఆర్.ఎస్.సూర్యప్రభ, వనస్థలిపురం
చలికాలం పిల్లల చర్మం కూడా ముడతలు పడటం గమనిస్తుంటాం. తాగే నీరు, తీసుకునే ఆహారాన్ని బట్టి చర్మం పొడిబారుతుంది. పొడి చర్మం గలవారికి చలికాలం ఈ సమస్య మరీ ఎక్కువ. ఒక ఏడాది చలికాలంలో చర్మ ఆరోగ్యం పట్ల శ్రద్ధ తీసుకోకపోతే ఐదేళ్లు వయసు పై బడినట్టుగా కనిపించే అవకాశాలు ఎక్కువ. చర్మం పొడిబారుతుంది కదా అని నూనెలు, మాయిశ్చరైజర్లు ఎక్కువగా రాసేస్తుంటారు. తర్వాత సబ్బులు, స్క్రబ్‌లతో చర్మాన్ని బాగా తోముతుంటారు. ఫలితంగా చర్మం మండుతుంటుంది.

ర్యాష్ కూడా వస్తుంటుంది. పైగా విపరీతమైన ఆవిరి పడుతుంటారు. దీంతో పోర్స్ ఓపెన్ అయి, చర్మం సాగుతుంది. ఆవిరి వల్ల లాభం తక్కువ, నష్టం ఎక్కువ అని గ్రహించాలి. ఇక ఈ కాలం చర్మానికి స్క్రబ్ కూడా ఎక్కువ చేస్తుంటారు. వీటన్నింటి వల్ల చర్మం ఇంకా డల్‌గా, డ్రైగా అయిపోతుంది. మీ ముఖ చర్మం ముడతలు తగ్గాలంటే సరైన మార్గం ఫేస్ ఎక్సర్‌సైజ్‌లు. నుదురు, బుగ్గలు, కళ్లు, గడ్డం.. ఇలా ఒక్కో పార్ట్‌ని సాగదీస్తూ 5-10 నిమిషాలు ఫేస్ ఎక్సర్‌సైజులు చేయాలి. ఆరోమ ఎసెన్షియల్ ఆయిల్స్ మాత్రమే రాయాలి. ఇవి చర్మాన్ని మృదువుగా మారుస్తాయి.

సహజంగా చర్మంలో నీటిశాతం ఉంటుంది. చలికాలం తక్కువ నీళ్లు తాగడం వల్ల చర్మంలో నీటి శాతం తగ్గిపోతుంది. దీని వల్ల చర్మం ఇంకా పొడిబారుతుంది. అందుకని రోజూ మూడు లీటర్ల మంచినీళ్లు తాగండి. శరీరంలో ఉండే మెకానిజమ్ కాలాలను తట్టుకునే శక్తి ఉంటుంది. కాలానుగుణంగా సమతుల ఆహారం తీసుకుంటే చర్మం పొడిబారడం సమస్య ఉండదు.